Það eru kannski ekki margar fiskuppskriftir hér á vefnum, enda er ég mikil kjötæta. En þessi þorskuppskrift er dásamleg, ekki skemmir fyrir að hafa girnilegt bacon fyrir kjötæturnar. Sumir segja að þorskhnakki sé “nautalund” hafsins.
Tag: Aðalréttur
Kjúklingur með hnetusmjörssósu
https://grgs.is/2013/12/06/kjuklingarettur-med-hnetusmjorsosu/
Það sem gerir þennan kjúklingarétt sérstakan er þessi hnetusmjörssósa sem þú færð aldrei nóg af.
Villisveppapasta
http://www.foodnetwork.com/recipes/jamie-oliver/pappardelle-with-mixed-wild-mushrooms-recipe.html
Sumir villisveppir gefa mikið Umami bragð, þannig að valið á hráefnum ráða algerlega hvernig þessi réttur kemur út.
Hægt er að kaupa þurrkaða villisveppi í krukku sem gefa fínt bragð, en úrval af ferskum villisveppum er ekki mikið hér á landi og mjög árstíðabundið.
lambaskankar með ansjósum
Ég skelli hérna inn myndbandi frá BBC Food, þar sem snillingurinn Nigel Slater eldar lambaskanka. Það sem einkennir Nigel er að hann notar yfirleitt fá hráefni og lætur þessu fáu hráefni njóta sín. Ansjósurnar sem hann notar eru eitt af mínum uppáhalds hráefnum.
Heill kjúklingur með sýrðum rjóma og ferskum kryddjurtum
http://mimithorisson.com/2013/04/18/the-windmill-in-blaignan/
Mimi Thorisson býr í franskri sveit og er draumi líkast að fylgjast með henni á bloggsíðu hennar. Þessi kjúklingaréttur kom mér skemmtilega á óvart.
Steiktar pylsur með fennel
http://mimithorisson.com/2013/01/14/roast-sausages-with-fennel/
Hér er önnur uppskrift frá Mimi, ef menn vilja breyta til þegar pylsur eru hafðar á boðstólnum, þá er þessi tilvalin.
Nautasteik með myntu og sinnepsdressingu
https://shadowcook.com/2008/07/27/nigel-slaters-seared-beef-with-mint-and-mustard-dressing/
Hér er Nigel Slater með skemmtilega Nautasteik, þar sem hann notar myntu og sinnep á skemmtilegan hátt. Vel þess virði að prófa.
Spaghetti Carbonara
http://blog.pressan.is/ragnarfreyr/2006/12/17/558/
Spaghetti carbonara er alltaf vinsælt, ég mæli sérstaklega með því að kaupa baconið hjá Kjötpól Laugalæk, en þar er hægt að fá rosalega gott bacon óskorið.
Beouf Bourguignon
Þetta er uppskrift sem allir matarnördar elska, langur eldunartími og djúpt og unaðslegt bragð, ekta Umami !
Nautasteik með cafe de paris sósu
(http://www.laeknirinnieldhusinu.com/2014/04/steik-me-cafe-de-paris-sosu-bokuum.html)
Þessa uppskrift sá ég í bók frá Ragnari Frey Ingvarssyni, betur þekktum sem Læknirinn í Eldhúsinu.
Það sem er sérstakt við þessa uppskrift er sósan, Cafe de Paris. En þetta er vel þekkt smjörsósa með ansjósum og það er fátt í heiminum sem vekur meira Umami bragð en þessi elska.
Tómatsúpa
Alveg einstaklega einföld og ljúffeng súpa
Uppskrift
1 msk. olía
1 stór laukur
2-3 msk. karrý
1 dós kjúklingabaunir
1-2 dl. mjólk eða rjómi
3 dósir niðursoðnir tómatar
Steikið laukinn upp olíunni og karrrýinu. Bætið tómötunum og kjúklingabaununum saman við og látið sjóða í 10-15 mínútur. Maukið með töfrasprota, hrærið að síðustu mjólkinni eða rjómanum saman við. Gott er að bera sýrðan rjóma og ferskan kóríander fram með súpunni.
Svínalundir með sítrónusósu
Mér leist nú ekkert allt of vel á þessa í fyrstu en eiginmaðurinn eldaði þetta fyrir mig eitt kvöldið, þvílíkt nammi, og sósan kallar sko fram Umami bragð.
Uppskrift
450 gr. grísalundir
1 bréf parmaskinka
250 gr. mascarpone ostur
Safi og börkur af einni sítrónu
2 tsk. salvía
Salt og nýmalaður pipar
Ristið skurði í lundirnar með um það bil 1,25 sm. bili á milli, passið að skera ekki í gegnum kjötið. Setjið ostinn, börkinn, salvíuna, salt og pipar í skál og landið vel saman. Fyllið skurðina í kjötinu með blöndunni, leggið afganginn af henni til hliðar. Vefjið parmaskinkunni utan um kjötið. Setjið kjötið í eldfastmót og steikið í ofni 30 mínútur. Þegar lundirnar eru tilbúnar takið þær út og leggið til hliðar. Hellið soðinu af lundunum í pott, bætið sítrónusafanum og afganginum af blöndunni saman við og hrærið vel í. Smakkið til með salt og pipar.
Svínahnakki með anísbættri ostrusósu
Bara nafnið á þessum rétti fær munnvatnið til að fljóta. Anísbætt ostrusósa er vægast sagt Umami. Hvítlaukurinn og chilli gefur ákveðinn tón í umami bragðið.
Uppskrift
4 x 200 gr. grísahnakkasneiðar
Anísostrusósa
½ dl sojasósa
½ dl. ostrusósa
½ dl vatn
5 heilir stjörnuanísar
1 hvítlauksrif, smátt saxað
1/3 chilli aldin, smátt saxað
1 msk. hunang
Setjið allt í skál og blandið vel saman. Leggið kjötið í skálina og geymið í kæti í 2 klst. Strjúkið þá sem mest af anísleginum af kjötinu ofan í pott og setjið restina af leginum úr skálinni í pott og sjóði í 5-7 mínútur eða þar til að hann fer að þykkna. Grillið steikurnar í 3-4 mínútur á hvorri hlið. Penslið þá kjötið með anísleginum og grillið í 2-3 mínútur í viðbót.
Borið fram með restinni af anísleginum, kartöflum og grænmeti.
Karmelluð andabringa á salati með sætri sojadressingu
Þarna spilar sojasósa og sætan saman og gefur gott umami bragð. Önd er líklega ekki oft á matseðlinum hjá fólki og því telst þessi réttur vera sannur hátíðarréttur.
Öndin
4 andabringur
Salt og pipar
Brúnið bringurnar á pönnu eða grilli og gætið þess að elda þarf bringurnar lengur á fitumeginn til að fitan verði stökk (um það bil 70% tímans á fituhliðinni) Kryddið með salt og pipar. Eldið bringurnar í ofni við 100°C í 5 mínútur eða þar til þær verða aðeins minna en miðlungssteiktar (kjarnhiti 50-55°) Skerið bringurnar niður.
Karmellusósa
200 gr. sykur
50 gr. smjör
½ dl. rjómi
Brúnið sykur við vægan hita, bætið smjöri úti í og hrærið rjóma loks saman við. Látið sjóða í 5-6 mínútur við vægan hita.
Veltið andabringunum upp úr heitri karmellusósunni.
Salat
1 granatepli
1 poki klettasalat
Takið fræin úr granateplinu og blandi saman við klettasalatið.
Sæt sojadressing
1 dl sojasósa
1 msk. hlynsíróp
1 msk. sesamolía
1 tsk dijonsinnep
1-2 skallott laukar smátt saxaðir
Öllu þessu blandað saman
Uppsetning
Setjið salatið á disk og hellið sojadressingunni yfir. Leggið sneiðar af andabringunni með karmellusósunni ofan á.
Buff Tartar
Algjört sælgæti fyrir þá sem leggja í það að borða hrátt kjöt, æðislegur sem aðalréttur, en einnig tilvalinn sem forréttur fyrir þá sem vilja bara rétt smakka.
Uppskrift
500 gr. nautakjöt file eða lund
2 eggjarauður (ekki ískaldar)
2 ansjósuflök
2 tsk. dijonsinnep
1 tsk. tómatpúrra
1 tsk. worcestersósa
1 msk. ólífuolía
1 laukur mjög fínt skorinn
1 msk. ætiþistlar úr krukku, fínt skornir
1 tsk. kapers fínt skorið
Skerið kjötið mjög fínt (ekki hakka). Blandið saman öllum hinum hráefnunum. Blandið kjötinu rólega saman við þar til allt hangir vel saman. Skiptið kjötinu í 4 parta og mótið í buff.
Berið fram með salati og brauði
Savoykjúklingur
Þessi kjúklingaréttur er ekta franskur sveitaréttur, og er frábær tilbreyting á kjúklingaeldamennsku. Rosalega bragðgóður og ég lofa ykkur því að ef þið prófið hann einu sinni þá verður hann fastur liður á matarborðinu ykkar framvegis.
Uppskrift
1 stór kjúklingur
Salt og pipar
1 steinseljubúnt
3-4 estragon greinar
2 smálaukar
2 ½ dl. kjötsoð
1 dl hvítvín
3 msk. rifinn ostur
2 dl. rjómi
2 msk. hveiti
2 tsk. dijon sinnep
2 msk. brauðmylsna
4 msk. smjör
Skerið kjúklinginn í fernt og núið hann með salti og pipar og 2 msk. af smjörinu. Látið bitana í eldfast mót ásamt steinselju, estragoni og lauk, hellið 1 dl, af kjötsoði yfir og setjið í 220°C heitan ofninn í 50 mínútur. Vætið kjúklinginn af og til með soðinu. Bræðið 2 msk. af smjöri í potti hrærið 2 msk. af hveiti út í og blandið með afganginum af kjötsoðinu, víninu og rjómanum. Bragðbætið sósuna með sinnepinu. Blandið saman brauðmylsnunni og rifna ostinum.Takið kjúklinginn úr út ofninum setjið hann á fat og hellið safanum úr mótinu í gegnum sigti út í sósuna og hrærið vel. Setjið kjúklinginn aftur í eldfastamótið hellið sósunni yfir, stráið osta brauðmylsnublöndunni yfir og látið aftur inn í ofninn og látið réttin gyllast.
Borið fram með brauði og salati.
Ólífukjúklingur
Hér er réttur sem systir mín eldaði fyrir okkur um árið. Mörg skemmtileg bragðefni sem gefa kjúklingnum höfugra bragð og braðlaukarnir dansa.
Uppskrift
2 msk ólífuolía
1,5 kg. kjúklingur
1 stór laukur, sneiddur
1 msk. rifinn engiferrót
3 hvítlauksrif marin
1 tsk. paprikuduft
250 ml. kjúklingasoð
2-3 saffranþræðir settir í 1 msk. af sjóðandi vatni
4-5 vorlaukar saxaðir
15-20 svartar og grænar ólífur
Safi úr hálfri sítrónu
Salt og svartur pipar
Olían hituð í stórri pönnu eða pottir, kjúklingurinn brúnaður. Kjúklingur tekinn upp úr. Laukur, engifer, hvítlaukur og paprikukrydd sett í pottinn og svissað aðeins, kjúklingur settur aftur í pottinn ásamt kjúklingasoðinu og saffraninu. Suðan látin koma upp og soðið í um það bil 45 mínútur. Þá er vorlauknum og ólífunum bætt út í og soðið áfram í 15 mínútur. Að lokum er sítrónusafanum bætt við og soðið áfram í 5 mínútur. Kjúklingurinn settur á fat (djúpt) og sósu hellt yfir,
Borið fram með hrísgrjónum og salati.
Austurlensk súpa
Austurlensk súpa sem við köllum alltaf “fiskisúpuna”, samt er hún með kjúklingabringum. Held að nafnið komi til vegna þess að við þurftum í fyrsta skipti að nota fiskisósu sem lyktar ekki beint vel og er ekki bragðgóð ein og sér en gerir kraftaverk í matargerð og er mikið notuð í austurlenskskri matargerð. Þessi súpa er afar matarmikil og klárast alltaf upp til agna.
Uppskrift
1,4 l. bragðmikið kjúklingasoð
6 dl. ósæt kókosmjólk
500 gr. kjúklingabringur
370 gr. sveppir
3 msk. asísk fiskisósa
3 msk. olía
1 msk. rautt karrýmauk
4 ½ stk. vorlaukar, fínt sneiddur
9 stk. þunnar engifersneiðar
9 stk. mulin kóríanderfræ
4 ½ stk. þurrkuð limeblöð
1 ½ stk. sítrónugrasstilkur (lime gras)
1 ½ hvítlauksgeiri, saxaður
1 ½ laukur
2 lime (bara safinn)
Salt og pipar
Kóríander til skrauts
Hreinsið sítrónugrasið og skerið í 2-3 bita. Setjið olíuna í stóran pott ásamt lauk, hvítlauk og kóríanderfræjunum hitið upp á miðlungshita, svitið í 1-2 mínútur og hrærið í. Bætið því næst sítrónugrasi, karrímaukinu, engiferinu og limeblöðunum út í. Sjóði og hrærið í um það bil 3-4 mínútur, bætið þar næst kjúklingasoðinu í, sjóðið upp og lækkið hitann. Látið sjóða í um það bil 15 mínútur. Brytjið kjúklingabringurnar í 3-4 sm. Bita. Skerið sveppina í fernt og sjóðið í áfram í 5 mínútur eða þar til kjúklingurinn er tilbúinn. Hrærið og bætið lime safanum og fiskisósunni út í. Bragðið og kryddið til eftir smekk.
Borið fram með vorlauk og kóríander.
Nautalundir í litlum sneiðum með kúrbít og salati
Hér er skemmtileg aðferð að útbúa nautakjöt, ég nota lundir en vissulega er hægt að nota annan part af skepnunni. Kúrbítur og salatið léttir réttinn og myndar andstöðu við þungt kjötið.
Uppskrift
600 gr. nautalundir
Skornar í 1 sm. þykkar sneiðar
1-2 kúrbítar skornir í sneiðar
1 lítið eggaldin skorið í sneiðar
1 höfuð eikarlauf, skolað vel í vatni og þerrað (eða annað grænt salat)
1 dl. blandaðar ólífur
4 msk. þurrristaðar furuhnetur
2 msk. sólþurrkaðir tómatar
4 msk. nýrifnar flögur af parmesanosti
1 ½ dl. jómfrúarolía
1 msk. balsamikedik
1 búnt fersk basilíka
2 hvítlauksgeirar
1 tsk. rifinn sítrónubörkur
Salt og svartur pipar úr kvörn
Steikið kjötið eldsnöggt á rifflaðri pönnu eða útigrilli. Saltið og piprið. Veltið kúrbítnum og eggaldinsneiðunum upp úr olíunni og steikið á sama hátt saltið og piprið.
Rífið niður salatið og setjið í skál. Takið 4 msk. af olíu og hrærið saman við 1 msk. af balsamikedikinu, saltið og piprið. Hellið þessari vinagrettu yfir salatið og blandið vel saman, Látið salatið á miðjan diska eða fat. Raðið litlu nautasteikunum og kúrbíts- og eggaldinsneiðunum umhverfis salatið. Setjið ólífur meðfram og á salatið. Látið sólþurrkuðu tómatana yfir. Stráið þurrristuðum furuhnetunum yfir salatið. Látið basilíkublöðin, hvítlauksgeirana og sítrónubörkin í matvinnsluvél og hakkið fínt. Hellið afganginum af olíunni saman við og saltið og piprið að smekk. Skvettið þessu fallega yfir litlu steikurnar, kúrbítinn og eggaldinið og látið að síðustu nýrifnar parmesan flögur yfir allt saman.
Lambainnanlærisvöðvi með kryddjurtum og parmesanosti
Hér er á ferðinni lambakjötsréttur þar sem sérstök kryddblanda myndar afar bragðgóða húð utan á kjötið, ítölsk áhrif svífa þarna yfir vötnum. Best er að flýta sér ekki við að snæða þennan rétt, miklu frekar að taka sér góðan tíma með ítölsku rauðvínsglasi og helst í góðra vina hópi.
Uppskrift
800 gr. lambainnanlærisvöðvi
½ dl. ólífuolía
3 msk. blandaðar ferskar kryddjurtir (timían, oreganó, rósmarín, steinselja, eða hvað sem vill)
3 msk. nýrifinn parmesanostur
1-2 hvítlauksgeirar
2-4 msk. brauðrasp
Salt og pipar úr kvörn
Blandið saman í matvinnsluvél olíunni, kryddjurtunum, parmesanostinum og hvítlauknum. Keyrið allt í fínt mauk. Látið smávegis af brauðraspi út í til að þykkja maukið.
Brúnið kjötið á pönnu, þekið það með kryddjurta og parmesanblöndunni. Bakið við 160°C í um það bil 12-15 mínútur eða þar til kjöthitamælir sýnir 62-64° hita inn við miðju.
Sósan
1-2 skarlottulaukar, fínt saxaðir
2-3 hvítlauksrif
1 msk. ólífuolía
1 dl. hvítvín
3 dl. gott kjötsoð (nauta- eða lambasoð)
3 msk. kryddjurtir, saxaðar (sömu tegundir og notaðar eru í hjúpinn)
Sósujafnari
2 msk. smjör
Salt og pipar
Léttsteikið laukana upp úr olíunni og hellið hvítvíninu yfir. Látið sjóða vel saman og hellið kjötsoðinu yfir. Látið sjóða niður um 1/3, Setjið þá kryddjurtirnar saman við og bragðið á. Bætið salti og pipar út í eftir þörfum. Þykkið aðeins með sósujafnara. Hrærið að lokum köldu smjörinu smátt og smátt saman við.
Rísottó rétttur
Þetta Risotto er æði, það sem mér finnst sérstaklega ánægjulegt er að hneturnar, osturinn, parmaskinkan með perunum er borið fram sér með Risottoinu, þannig að þú ræður hve mikið magn af hverju fer endanlega á þinn disk.
Uppskrift
1 laukur
2 hvítlauksrif
olía
Rísottóhrísgrjón 250 gr.
Kraftur (svína eða grænmetis-) tæpur 1 lítri
1 glas hvítvín
Parmaskinka
Perur
Valhnetukjarnar
Parmesanostur
Gróft salt
Svartur pipar
Svissið lauk og hvítlauk í smá olíu á pönnu, setjið hrísgrjónin út í, steikið þar til grjónin fara að verða aðeins glær, hellið þá hvítvíninu saman við og leyfið að sjóða niður, bætið þá krafti saman við í smá skömmtum, ekki of mikið í einu, leyfið grjónunum að drekka í sig allan vökva áður en bætt er meira út í og hrærið vel í á milli. Smakkið til með salti og pipar.
Berið fram með upprúlluðum parmaskinkusneiðum, ferskum perubitum, gróf söxuðum valhnetukjörnum, ferskum parmesanosti og grófu salti og pipar,
Ítalskar kjötbollur
Þenna rétt höfum við hjónin eldað í 20 ár. Hann tekur mikin tíma í undirbúning og því þarf að fara með því hugafari í eldamennskuna að njóta þess. Rétturinn er klassískur ítalskur réttur og svona heimagerðar bollur eru algert lostæti.
Kjötbollur
6 brauðsneiðar án skorpu
½ dl mjólk
200 gr, nautahakk
200 gr. Svínahakk
2 egg
½ dl fersk steinselja smátt söxuð
3 msk. Parmesan ostur ný rifinn
2 hvítlauksgeirar smátt saxaðir
Salt og pipar
½ dl olía
Rífið brauði niður í bita og leggið í bleyti í mjólkinni í 5 mínútur. Bætið því næst hakkinu, eggjunum, steinseljunni, parmesanostinum og hvítlauksgeirunum úti í og kryddið með salt og pipar. Mótið úr farsinu litlar bollur. Hitið 2 msk. af olíunni á pönnu og steikið bollurnar við mikinn hita í 3-5 mínútur snúið þeim reglulega. Takið bollurnar af pönnunni og setjið á disk.
Sósan
80 gr. Laukur, smátt saxaður
2 hvítlauksgeirar smátt saxaðaðir
750 gr niðursoðnir tómatar, gróft saxaðir
1 ½ dl. rauðvín
2 dl. kjötkraftur
½ dl fersk steinselja, smátt söxuð
1 msk. ferskt oregano eða 1 tsk. Þurrkað
Salt og pipar
Léttsteikið laukinn í afganginum af olíunni í 2-3 mínútur, Bætið þá hvítlauknum saman við og steikið áfram í 1 mínútu. Bætið tómötunum út í ásamt vökvanum, rauðvíninu og kjötkraftinum kryddið með salt og pipar. Látið suðuna koma upp á sósunni, lækkið hitann setjið lok á pönnuna og sjóðið við vægan hita í 30-45 mínútur. Stuttu áður en sósan er tilbúin er bollunum bætt út í og sósan þykkt ef vill með sósuþykkni.
Berið fram með pasta, brauði og parmesanosti.
Spaghettí með Portkonusósu
Þessi uppskrift er í algeru uppáhaldi hjá mér. Portkonusósan er fullkomið Umami, finnst mér. Ég elska þessa sósu svo mikið að ég nota hana með öðru hráefni líka, skipti til dæmis spaghetti út og nota kjúkling í staðinn.
Uppskrift
Slatti af ólífuolíu
8 – 10 hvítlauksrif
1 dós ansjósuflök
2 dósir niðursoðnir tómatar
Bolli af svörtum ólífum
Slatti af kapers
Steinselja
Olían er hituð ansjósuflökin marin út í og smátt saxaður hvítlaukurinn (ekki pressaður). Olían má ekki ofhitna, látið malla í smá stund. Tómatar maukaðir og settir úr í ásamt safanum. Kapersið og ólífurnar skornar smátt niður og bætt út í. Þetta sýður í nokkrar mínútur ekki of groddalega. Best að smakka sósuna til og pipra örlítið. Öllu hellt yfir spaghettí og hrært saman við. Steinselju stráð yfir.
Kartöfluréttur
Mjög góður réttur bæði sem aðalréttur með salati eða sem meðlæti með til dæmis kjúkling.
Uppskrift
1 kg. kartöflur
2 stórir laukar
1 hvítlaukur (pressaður eða saxaður)
2 dósir tómatar
3 dl. kjötkraftur
1 lárviðarlauf
1 msk paprikuduft
½ tsk timían
Salt og pipar
Rifinn ostur
Laukarnir settir á pönnu í olíu og létt steiktir, öllu hinu skellt útá látið malla í nokkrar mínútur. Sett í smurt eldfast mót og inn í ofn í 30 mínútur við 200 ° C. Þá er mótið tekið út og rifni osturinn settur yfir og aftur inn í ofn í ca. 30 mínútur.
Mjög gott að skipta rifna ostinum út fyrir gráðost fyrir þá sem borða hann,
Stroganoff
Fyrsti maturinn sem ég fékk hjá tengdó, hef alltaf haldið sérstaklega upp á þennan, lúmskt góður.
Uppskrift
Nautagúllas 750 gr.
100 gr.smjörlíki
1 tsk. salt
½ tsk pipar
1 lítill laukur
200 gr. sveppir
6 mtsk. tómatsósa
1 dl. vatn
3 dl. rjómi
1 tsk paprikuduft.
Kjötið kryddað með salt og pipar og brúnað á pönnu ásamt lauknum, sveppunum bætt úti og létt steiktir. Að lokum er vatninu, tómatsósunni, rjómanum og paprikuduftinu bætt útí og allt soðið saman í 40 mínútur.
Borið fram með hrísgrjónum og kartöflustöppu.
Pasta með túnfisk og basil
Þennan rétt fengum við hjónin fyrst að smakka þegar nágrannar okkar í sama húsi buðu okkur í mat fyrir þó nokkrum árum síðan. Bragðgóður og auðveldur í undirbúningi.
Uppskrift
Fresh basil sósa (eða grænt pestó)
Olía
1 laukur
2 sítrónur
1 túnfiskdós
Ostur
Salt og pipar
Laukur steiktur í olíu og kryddaður með salt og pipar, látið krauma. Safinn úr sítrónunum kreistur út í. Túnfiskinum er síðan bætt út í + meiri olíu. Pastað soðið. Öllu hellt saman í skál ásamt ostinum og 2 msk. af fresh basil sósunni.
Mitt Umami 